牛蒡瑤柱紅蘿蔔蝦米肉碎焗飯

冬天好愛食有味飯,呢款係家人愛食之一,牛蒡好少煲湯,因覺食埋仲有益,佢纖維高,所以焗飯好啱,大家又試吓,好好食架,但冬夨手凍時就刨得好"金"呢....

木瓜南北杏雪耳眉豆無花果乾貝豬骨湯

天氣凍又乾燥,煲過潤肺清甜湯,飲完真係好潤架

墨魚汁蝦意粉

我係醬汁怪,因見有平會買定係家人先算,所以有好多包未用架..哈,今次玩吓呢款,原19.8,特10.8,呢個牌子仲有好多味,之前試過佢番茄蟹味煮番茄意粉,一樣好味,墨魚汁完全唔知乜味??,開咗有好濃墨汁味,但唔夠鮮,好在冰櫃有蝦,用蝦頭,西斤,蒜,葱煮個湯,加埋落去,蝦身煎香放埋,嘩,正到不得了,妹話仲好食過乜乜意粉屋喎??真的嗎,咁就好啦,但妹妹回家時提她要照吓排牙,唔係打朝呼時就失禮人啦

蘿蔔糕

天氣凍,又嚟食粥同熱辣辣蘿蔔糕啦,不過有3隻手指好痛,生3粒凍瘡,所以整得好辛苦,但見家人食得開心,值得,

整咗4斤半蘿蔔糕,好大底,媽媽第二日煎嚟食,佢話好滿足,係香口,但下次唔好食咁濃呢.......哈

 

 

 

嫲嫲靚湯---烏雞瘦肉乾蓮子乾貝雪耳粟米紅蘿蔔無花果

我本來只係落2蜜棗煲烏雞,好少落無花果,今日唔知做乜落多兩粒無花果,心想以為煲湯酸啦,當試味時又好甜喎,家人話好好飲添,仲好潤,咁我下次都咁煲,嫲嫲都鍾意呀,

冬至快樂---鵝掌冬菇炆花膠

花膠浸咗2日,中途要换2次水,

花膠用薑片葱段蒜頭紹酒出水,焗至水涼,鵝掌用薑片葱段蒜頭紹酒出水,煎香葱段,蒜片,薑,幾件肉粒,冬菇浸,用蠔油,糖,生抽糖,麻油醃

鑊下回配料(不用下油,因炒配料時有少少油),下冬菇炒至有香味,全放材料,汁:鮑汁,蠔油,生抽,老抽,冰糖,上湯,水份大火先煮2分鍾,細火45分鍾,取出花膠,再炆多30分鍾至鵝掌淋身,回花膠煮滾

炆好

食得.

以住用開鴨掌,買時見好多人買鵝掌,佢比鴨掌大隻好多,因我家愛食淋身,所以炆耐點,但值得,好好食,好入味,我最愛..........................係個汁,超鮮甜,我好少食成1碗半飯,今次食咗,勁..

冬至快樂

龍蝦汁鮮尤蝦蘑菇意粉

 

 

蝦頭用牛油煎香,加西芹,蒜粒,上湯煑20MIN,隔出湯汁

 

炒香餘下西芹,洋葱,加少少麵粉,下蝦汁,白汁,龍蝦湯,白蘑菇,煮至杰身

 

 

好少買龍蝦湯,因好貴,但我次次都會八吓有冇平,昨天超開心,佢原36,特24,買罐試吓,因未飲過,最好係整意粉啦,但只靠佢係唔夠, 要有鮮味,加隻鮮尤,蝦,用蝦頭加西芹,蒜頭煮湯,加埋落龍蝦湯,家中冇芝士淡忌廉,咁我加包白汁,咁個汁就完美啦,昨晚個個食得好開心,我要拿拿淋入番幾罐先,都乜都好食,同現在愛用天使麵,好滑之餘又淋,啱晒父母親食,佢哋之前唔太喜歡意粉係因為太粗同硬喎,呢隻佢哋超like呀.

嫲嫲湯水---竹蔗雪梨紅蘿蔔馬蹄龍利葉無花果水

呢個水係參考美味娘娘,見她用雪梨加竹蔗無花果心個水一定好甜,我好少竹蔗加無花果,怕酸,自己試煲,原來真係好甜加,一定要推介呀,我落咗3大粒無花果,因煲比嫲嫲飲,不落太甜,呢個份量煲起係清甜,想多甜可以落多些,好潤肺,好啱呢排天氣乾燥.

魚肚冬菇洋葱雞煲

天氣凍,媽媽話想食魚肚,摷吓家中原來食晒魚肚,拿拿淋落雜貨店買,但好貴,3條要36元呀,但冇法,唔記得入貨,上次妹去流浮山一大包有12條才68元,不過好在買到,因有時想食但買唔到會好失望,那晚好凍,個個食得好開心都值得呢.

魚肚同冬菇要預先用蠔油,鮑汁,鏗魚汁,生抽,上湯炆好,取出湯汁晚上用嚟炆,洋葱要預先炒至金黃,煎好雞件,去油份,回洋葱,炆魚肚冬菇汁,細火炆焗10分鍾,回魚肚大火都至滾熱,下葱段,芫茜上卓食得,趁熱食啦.......................

暖立立----南瓜粟米肉碎乾貝絲粥

本來煲南瓜湯,但天氣凍想食粥,就南瓜粥,先蒸南瓜,壓碎,食完暖立立,南瓜同粟米係黃色食物,可補脾臟,啱晒冬天,

雞件雞汁煮芥菜粉絲

晚上只得媽同我,之前拜神有雞件同蒸雞汁剩,用嚟煮大芥菜,尾加粉絲吸汁,嘩正到爆,但一定要去晒雞油,雪咗一晚雞汁面會起晒雞油,好容易去除,個汁超鮮甜,我用嚟撈飯食,雞汁真係好夾大芥菜,大家仲可以加埋豆卜添.

樣樣齊罐頭燒汁魚炒飯

 

 

不知大家道拜神時會否買份樣樣齊,有九菜,蒜,芫茜,芹菜,恖,紅蘿蔔再用紅紙包住,咁以前媽媽會切段炒雞,但佢牙力差,這幾年多年粒炒飯,咁樣媽媽食到之餘又唔浪費,今次加罐燒汁魚仲正,唔知係咪有九菜,個飯超香,我下次炒飯都要加埋九菜先,大家試吓,不過就切到你叫救命架.....哈

換龍島濃厚朱古力藍梅蛋糕

妹妹滙豐好多積分,咁啱沙田龍島可以用,咁換個7吋大蛋糕,呢個係佢哋推介,就試佢,正到不得了,又唔太甜,朱古力超級香濃,十級好味,佢有迷你版,189元,大家可以試吓

煎獅頭魚仔

獅頭魚蒸得多,但想變化吓煎,用蛋黃加粟粉沾煎,嘩又滑又嫩又香口,食到個個唔停口,仲話唔夠,小食多滋味呀.

乾燥湯水---西洋菜紅蘿蔔鴨腎南北杏無花果豬展湯

這幾天天氣好乾,要飲番潤湯,一想就想起西洋菜湯味道,飲完好潤.

凍天煲菜---茄子蘆筍蒜香金沙骨煲

家人冬天愛食物熱辣辣上,我真係要搞盡腦汁架,打邊爐佢哋唔愛,食完熱氣,所以要煲仔菜上,呢個真係正不得了,超香口多汁,妹話好食過出面,因炸個金沙骨唔可以死炸,開頭大火1分鍾,細火用油浸佢15min,再大火2分鐘取出,再熱油回鑊炸多1mim,就可肉裏多汁,外面香脆,我炒完配菜再回金沙骨都一樣咁香脆,但小妹就冇口褔,因喉嚨痛,我要帶口罩煮飯架,只可聞見香,但冇得食,見家人食得開心又滿足晒,妹話一定要再encore,收到,等我好番先.