冬菜芹菜肉碎丸肚魚粉絲煲

天氣凍咗好多,大家保重啊..呢排多咗煲仔上,因熱辣辣嗎,今次呢個丸九肚魚真係未整過,都係聽揀魚位太太教整,但煮完真係甜到爆,但九肚魚多骨,小朋友未可食用,但大人就冇問題啦,我家每人可食4-5條呀,但我最愛粉絲,吸晒九肚魚甜味,九肚魚打邊爐一流呀,大家見到要試吓

温泉蛋柴魚片海帶烏東

 

前天凍個個想食熱辣辣烏東,就用咗家中包柴魚乾同海帶,加鰹魚汁,整湯底,加多隻温泉蛋同焯生菜鯪魚肉煲就一餐啦,不過好滿足呀.

泡菜肉碎

之前阿信屋做7折買咗幾罐泡菜,呢隻泡菜個汁好辣,但去掉個汁就冇咁辣,媽媽之前拍泡菜好辣唔食,但呢隻佢又得喎,但一定要去汁煮,加肉碎煮佢個汁超正,呢排天氣凍咗食佢飯都食多碗,我都怕我冬天會肥呀....

木瓜麥冬雪耳南北杏魚件無花果豬骨湯

 

                                                             呢粒係麥冬,加少少可養陰肺

 

買咗份海魚25元想煲木瓜湯,但好似覺唔夠甜,加多20元豬尾骨,煲湯真係好甜,同埋我今次買呢個木瓜係好熟,煲湯一流,家人話呢排天氣一星期要飲一次,但都要有靚木瓜先可以呢...

蒜椒鹽泥鯭

好耐之前整過,今日見有靚再回味一下,買咗8大條,4條椒鹽,4條蒸果皮一樣好食同嫩滑.

鑪魚件大豆芽粟米蠔士雪耳瘦肉湯

之前炒鱸魚球剩下2份鱸魚骨同頭,用嚟煲大呢個又下火又好飲,加雪耳煲個湯好似有d膠質咁,煲完件雪耳似食緊花膠,正

蒜香芹菜芫茜炒鱸魚片

 

鱸魚試過煎,煎扒,今次試吓起球炒,家人想食香口,就用蒜粒,芹菜粒,芫茜,葱粒呢d香口配料炒,上卓時個個嘩嘩聲,因真係好有鑊氣,送飯一流,推介

雞脾仔茄子煲

媽媽好愛食雞脾仔,呢隻牌子好似叫pure,係美國牌子,我家都好多時用,佢雞扒,都好好食架,因天氣凍,我炸完茄子,洋葱,粟米粒咁整埋一煲,咁樣就可以熱辣辣啦,家人都話好夾,但雞脾仔唔係炆佢喎,我用另一鑊煎到佢金黃,最尾伴一伴佢炸,咁樣雞脾仔先好食同多汁,炆佢冇咁好食.

大啡菇紅椒炒白豆角

 

 

好愛食呢隻大啡菇,焗同炒都一樣咁多汁,今次加埋雪櫃少少白豆角同紅椒,加少少xo醬調味,正...

秋天潤湯--西洋菜紅蘿蔔竹芋南北杏無花果豬骨魚湯

現在一鈿西洋菜好靚,係街市又20元一份魚,加埋雪櫃少少豬骨,又成一煲潤肺靚湯,現在天氣好多時乾燥,飲吓潤湯預防吓,咁就唔怕啦.

照燒汁雞脾仔

醃了一份雞脾仔本來想用嚟炆,但又想試吓第二種食法,係citysuper超市常看有燒汁雞翼,雞脾...咁就用燒汁整啦,原理係用番以前小妹整鰻魚照燒醬,煎好雞脾仔,再下自製照燒汁,老抽1湯,黑糖4湯,水煮至收汁即可,汁粉份量係好隨意,調到自己口味己可,多汁少汁自己控制,味道似鰻魚汁咁,但真係好好食,食落帶有少少黑糖香,推介

 

北海道帶子仔

 

 

係一田見有北海道帶子買,好多人買嚟做刺身,佢500G88元,1kg140元,多數會買1kg,底好多,我哋食刺身,父親食煎(佢乜生嘢都唔願意嘗試呀.....),一樣好食,我介紹比姑姑,佢買咗5包1kg,佢回家即食,但佢話有沙,問我為什麼,咁我唔太明,因我哋食又冇喎,第二天我即問番店員,佢話我姑姑一定中六合彩,因係會間中有,係帶子殼嚟,因佢始中係由殼取出,有時食到唔出奇,大家有没有呢種情況,係為會咁架,因我冇乜買生帶子做刺身經驗,多數係日式店食,可否同小妹分享吓,謝謝,但總括嚟話呢隻帶子係鮮甜的,煎我就不太見意,做刺身會正好多倍囉...................

 

推廣做到星期一,有時間去八吓

沙田新城市廣場三期一田百貨

天山雪蓮青欖龍利葉南北杏無花果萍果馬蹄

嫲嫲有咳同痰,不敢煲魚湯同肉湯給她,只係煲淡潤喉水比佢飲,她話好好飲,呢個係中藥店老闆介紹比我,萍果可改雪梨,仲清熱潤喉,啱晒而家個個開始打邊爐時間飲呢

魚湯芋絲番茄絲瓜丸丸煲

 

 

 

係街市有份好新鮮紅衫魚,25元有5條,今天天氣冷咗,用嚟整魚湯丸丸煲,又可以飲熱辣辣湯又可以伴飯食,正,個湯真係好甜,我貪心,乜都加d,所以大煲呀,番茄件伴魚湯食好正架.

乾貝粒煮絲瓜丸丸

 

 

本想用魚湯做湯底,但那天唔記得買魚,本來就咁炒,但絲瓜一定要有鮮味湯湯先好食,想起不如用乾貝粒,我洗一洗,再蒸,蒸好壓碎乾貝連湯有量杯1cup份量,真係好正,湯底好鮮甜,我加埋墨魚件同貢丸同煮,咁就一煲上,有湯,有魚,有瓜(我買咗2斤架)夠食啦..湯都唔洗煲,呢個咪湯囉,大家試吓,真係甜到爆破呀,我而家煲湯,焗飯,煲粥多數用乾貝粒多過榣柱,我成日都要用,乾貝經濟好多

 

自製煙肉洋葱薯仔蓉濃湯

之前整過南瓜濃湯好成功,用番個完理整薯仔濃湯,小妹一家好愛係街外飲忌廉薯仔湯,但就係怕佢落得太多忌廉,我不太喜歡,因我係不喜歡飲奶的人,總覺佢落咗好多,自己又試吓整,先切件薯仔(我呢個薯仔超大個用一個已有4碗)有有加1.5碗雞湯煮淋,再用大篩慢慢壓成薯溶,另鑊下1湯牛油(真係1湯己夠,因煙肉都有少許油出呢),下1片煙肉碎,1/4洋葱粒,炒香,落2湯麵粉伴均,再少少咁加水(約2碗)開稀,再回之前薯蓉湯,煮滾至自己喜歡稀杰度,再用壓薯仔器壓蓉洋葱粒,尾我加咗2湯濃芝士碎,呢個又係家人話要encore濃湯,因佢飲落一點都唔膩,薯仔好香濃,最緊要係乜都食晒,唔洗浪費食材,同少油少奶,健康好多,我媽媽一定要配蒜蓉包食喎.

超好食香煎加拿大豬肉條

 

 

 

大家要認住呢隻豬肉條,係一田有得買,初初見佢係唔吸引我,因佢有一大舊肥肉係表面(如圖1),但有次冇我想買豬扒,咁抱住乜都試吓心態買嚟食,但一定要揀有雪花才好食,回到家又諗唔到點整佢,媽媽話愛食香口,咁我用炒香蒜粒同乾葱,蒜鹽,椒鹽,少少雞粉醃佢有半日,因佢有一邊係肥肉,我切成粒粒先煎肥一邊,見佢金黃再煎另一邊,再四邊煎一煎佢見金黃,我取幾粒比家人食,佢哋好大聲咁話超好食,由其係媽媽" 阿女,呢隻係我心目中想食豬肉啦...",真係咁堅,我又食一粒,真係好似食緊燒肉咁,係呀,我一邊煎佢肥肉那邊時真係聞到燒肉香架,我好怕聞到豬肉蘇呀,但呢隻真係一邊煎佢一邊聞到燒肉香,可能我係灑胡椒鹽醃佢,但家人話呢隻豬本身好,食落豬肉粒係爽脆,所以一定要揀有少少雪花(小妹己影吓我揀肉標準),同埋以我哋食了4次經驗嚟說一定要有一邊係肥膏才好食,因佢煎完肥膏油之後舊肉粒係超香,有次買冇肥膏係冇咁香架,我媽媽真係超愛佢,佢話仲好食過燒肉,怕唔係成日有得買,今天同我買定3盒係凍櫃隨時有得食喎,真係比佢笑c我,我哋第一次係就咁煎香嚟食,之後我變化吓伴煎香薯片同菠菜一樣咁好食,由其係菠菜用番煎出嚟豬油(用少少好啦),炒起嚟特別香架,大家有機見到買嚟試吓,有些太太話bbq用佢嚟燒真係正到冇得頂呀.