watson"s換cheftopf--韓國玫瑰煲24cm+kitty 杯

我好少留意萬寧同watson"s換煲,但昨天幫媽媽買骨骼丸時原來有雙倍印花,員工問我換唔換煲,咁我話乜煲,一聽到係cheftopf--韓國玫瑰煲好想要,係我最愛淺粉紅呀,但我覺得冇咁多印花呢(要35電子印花),咁佢幫我check吓,有40電子印花呀,因昨有係雙倍印花日,嘩加329就有個24cm 煲用當然即要啦,開心咗成日呀,真係想抱住佢睡呀,哈............................................

同場加39.9換埋隻kitty杯(但我係扣晒咭中分數唔洗錢呢),回家即汁咖啡飲,超滿足,勁開心.

 

味噌洋葱炆澳洲薯仔

係街市見細細粒肥嘟嘟薯仔,本來用白汁煮,但又想用家中盒味噌炆,先焯7成熟,煎香表面加味噌汁(內有蠔油,燒汁,糖,上湯)炆多15MIN,焗15MIN,加炒至金黃軟身洋葱,家人話超咸香好味,佢食起好軟糯香甜,正,我哋冇食飯食晒佢己飽

嫲嫲靚湯---烏雞雪耳猴頭菇杞子南北杏粟米紅蘿蔔乾貝無花果湯

煲比嫲嫲補身,唔敢用太多藥材同加花膠,用上面材料煲起啖湯超鮮甜,嫲嫲好愛.

mix鮮茄醬意粉

呢包醬係番茄蟹肉忌廉汁,有w次一田買一送一,放了一排又忘了,有天見摷番出來,但太少唔夠一家人食,佢哋要多多汁,咁我用3大個番茄,半個洋葱,1條西芹,5條鯷魚,茄膏煮個底汁,加埋2包醬汁,嘩,好夾味,不得了,家人超愛呢個Mix汁,佢哋話次次都咁整喎,

 

 

黑松露青醬蝦炒幼意粉

自己太心急之過,冇試過味就買,佳因我食過呢隻牌子黑松露醬,咁我見佢寫住黑松露青醬,問個售貨員又話好有黑松露香,64元180g唔貴又試吓,但一開蓋不但冇黑松露味,連青醬香唔都唔似,似好重香草味,同有點像羊蘇味,當下真想掉咗佢,但又唔想浪費,咁我用咗芫茜巠,切粒,蘑點蒜泥,伴落醬入面,因佢唔夠味,用咗可溶芝士煮個汁,加埋煎香蝦頭煮個汁,煎埋蝦身,最尾加埋芫茜葉碎,咁想出來個味全家都受落,仲話同樽內味唔同,可能咁多樣鮮味配合而成,同炒起個意粉好咸香,所以一太盤食晒,我最開心係冇浪費,好在唔太貴,真係一次大教訓,以後要試過味才買囉...........................................

鹵金沙骨

家人愛食有骨肉,但太多肉又唔愛,咁找我買幾條金沙骨,上面一層厚肉切咗去醃嚟煲粥,剩下炆醃一醃,加生抽,老油,冰糖,五香粉,一個洋葱,蒜片,薑片炆20MIN,焗20MIN,重覆2次,至晚上大火收汁,家人話咁樣整好過多汁,仲野味好多,我見佢哋食得好滋味呢,仲話咁樣唔洗食太多肉次之餘又可以有骨吮,但其實骨外有包有好多肉食架,只係去咗一層肉,唔會冇肉食,唔想食太多肉朋友又試吓呢個方法,因去街市唔會話少肉多骨比你買呢.

洋葱炒蝦

我冇口褔,皮膚 好,蟹,蝦我都無褔消受,次次都係得個望字,但呢個洋葱蝦我都可以食洋葱,好過冇,但見家人食得開心自己又開心番了

白果瑤柱粥+煎鯪魚餅+芽菜炒麵

唔記得影白果粥,加多個炒銀絲菜,又一餐,但好滿足.

白蘿蔔條煮火鍋肉片

媽媽好愛食蘿蔔條,但有時食咗會肚痛,可能寒,之後我看書話炒一炒2湯白米,再下蘿蔔條,薑片炒一炒,加水,冰糖煮一煮20MIN,可去寒氣,取起再加汁:味噌,蠔油,鏗魚汁,生抽,煮過蘿蔔冰糖水煮一煮,回煎香肉片,收汁埋芡即可,咁樣整蘿蔔條好淋甜,現在蘿蔔好靚,媽媽唔怕肚痛之餘要愛我一星期煮一次比佢食,收到....

嫲嫲靚湯----粉葛鮮淮山紅蘿蔔蠔士南北杏無花果豬骨湯

呢個湯甜到不得了,因嫲嫲唔飲得豆類湯,所以唔可以落赤小豆扁豆,我想嫲嫲潤肺,加咗兩大粒土耳奇無花果同兩粒蜜棗,估唔到咁夾味,我就最愛食煲過湯鮮淮山,好好食,又粉又正.

蒸藍蟹

今次魚佬叫我食一公一母,母真係超多膏,之前看dodo姐係韓國用蟹蓋伴飯食,佢哋一樣咁伴嚟食,仲加埋蒸出蟹汁食,但媽媽食埋今次唔可以再食蟹啦,因上次以為佢係飲咁菊花茶才肚痛得好厲害,但今次己飲埋薑茶,一樣係咁,痛足4小時,好在早上己冇事,完全正常,中藥老闆叫我煲番雲苓白朮扁豆衣比媽去濕健脾,係咪蟹真係咁毒????,但我哋又冇事喎????真係想知出了什麼原因,有冇人真係好似我媽咁呢???媽話可能年紀大身體差咗,以後父親同妹想食才買比佢哋,唔係我真係唔會再買啦,因見她咁辛苦,嚇到我半"C"驚驚呀...........

白汁白蘑西蘭花薯仔火鍋肉片煲

天氣涼咗好,又想食白汁煲,有時特價買定白汁包,左搭右配咁調出自己想食味道,我對奶不太感興趣,所以用淡忌廉做出白汁我食不到,比較重奶味,但包裝汁我又食到,奇怪,呢個汁好食,啱我,最緊要啱自己時又啱家人食就可了,一上卓好熱辣辣妹即太叫"yummy"快ko晒,肚子滿足了

 

 

銀魚仔蒸肉餅

 

妺係流浮山買銀魚仔好大條,用嚟蒸肉餅好夾味,係肉餅內加多2粒浸淋瑤柱多份海味鮮香,所以個肉汁超鮮甜,肉我係買水展加多1/5肥膏挆碎,所以好滑呢.

煎倉魚

買了兩條好新鮮倉魚,本來蒸,但妹話想食煎,再沾日式沙律醬食,就煎,好在煎,真係超好食,正,但好貴,呢兩條11兩重要55元呀,真係乜都貴,但見家人食得好開心算啦.

素--合掌瓜栗子紅蘿蔔馬蹄冬菇湯

見網友Mable煲素湯,媽媽好想飲,即煲,但唔記得買粟米同腰果,不過一樣咁甜,那種栗子香甜超正,個個都愛飲,平常飯卓上一定有碟肉,所以湯水有時煲吓素平衡吓,大家都要煲吓素湯飲吓,好健康,對身體好有益.

冬菇魚肚炆泰安雞

之前妹去流浮山買咗海味,魚肚炆冬菇雞係絶配,今次炆2條太少,妹話下次炆3條,因佢要帶飯番學食喎,收到

煎金蠔

妹學校老師要去天水圍學校交流,完成後有位老師有車,話楂10分鍾車就可去流浮山,咁佢哋一班老師就去食海鮮啦,去開妹買咗12隻金蠔(130元)一包沙爆魚肚(68),銀魚仔,咁我不太懂整,上網看說先浸一浸軟,加薑汁酒蒸15MIN,放涼吸乾水份,沾少少粉,細火煎焗約12-15MIN,中途加汁料,2湯糖,老抽,蒸好蠔汁,最尾我加多1大湯蜂蜜,她們說好香口,不過咸咗少少,我想可能我加埋蒸好蠔汁落去,因佢係即開即曬,所以蠔本身有一定咸度,仲有6隻,下次再看看網上朋友仔怎整好一點,但好在係外少少香脆內係軟的,食住先啦

火鍋牛肉炒芽菜烏東+萍果雪梨龍利葉海玉竹水

 

今日炒個烏東比家人食,因有牛肉,煲個萍東果雪梨海玉竹水比家人潤吓,最近看老表你好HEA笑C我,由其係蔣志光首相逄何必曾相識,以前係中學時飲歌,勾起好多回憶呀

煎海油立

油立好少有,係海魚,大家見到買嚟食吓,蒸煎一樣咁鮮甜

西洋菜鴨腎雪耳紅蘿蔔無花果南北杏豬骨湯

真係開始涼啦,大家要小心身子呀,現在多數潤肺竹湯多,呢個湯好甜好潤,雪櫃有半個雪耳剩,加埋落好潤點,雪耳煲起吸收晒湯汁好好食呀,