燉黑豆

 

 

呢個食法己一排,因看韓劇都會見韓國人枱面都有泡菜同黑豆伴食飯,黑豆係有一定營養,而且黑色入腎,上網看佢有好多好處,咁家中有一大包黑豆,咪浸佢一日,再煮淋佢,我係看小小米桶學炆,但醬油我放1-2湯己夠,唔想咁咸,自己要試味呀....炆好放涼,每次煮好飯放些係飯面,焗熱一熱佢再伴埋一齊,家人連埋一齊食,唔錯架,就咁食一樣好食,甜甜咸咸咁好有口感

 

西餐----厚切煎薯仔片伴豬扒

天氣太熱,冇乜意念食飯,家中2大個薯仔,煮至8成熟(若15-20MIN),切厚片,灑鹽醃一醃佢,再煎香表面,每人煎多件豬扒,一大碟菜,又一餐,呢個厚切煎薯仔片係家人最愛,多過炆,因佢即煎香表面,內裏軟淋咸香超好食,唔夠咸可灑少少椒鹽一樣正...真係好鬼熱呀....

牛油蒜香上湯藍青口

一田特價買咗呢隻食,但唔好食,肉質梅的,但煮起個湯又好甜喎,奇怪????

好味芝士青瓜餅

青瓜刨絲煎餅食好正,家人食上癮,隔日就要整,食呢個唔洗食飯,加多份泡菜又可一餐啦....,餅中我加咗5粒芝士粒,鹽份量減少,好味好多架..

鮮土茯苓赤小豆乾貝蠔士百合紅蘿蔔豬尾骨果皮湯

之前食咗牛,牛始終比較毒,要幫佢哋去毒,而且天氣又常落雨,要去濕解毒先,就煲土茯苓,鮮土茯苓比較甘味重,之前最好出水,同會加鮮味乾品同豬尾骨煲,個湯即時鮮味甘甜好多,以前妹妹唔愛食,因家人煲得比較苦,但呢個煲法妹妹飲咗2大碗呀.

紅燒牛肋肉麵

妹妹及媽媽愛食牛肉,好想整呢個比佢哋食,用自己調味方法整,雖然味道不及出面,但用咗好多愛心架,好在佢哋食到停唔到口,我係用美國牛肋骨,她們話炆起淋之餘有口感,仲好有牛肉香味,正呀.

調味么我係用沙茶醬,韓式味噌,台式醬油膏,冰糖,上湯,食得辣可以加豆辨醬,仲正,但她們唔食得,所以唔辣呢

乾炒沙爆魚肚肉碎

好想炒味乾身魚肚食,就試吓,魚肚前一天浸透,去肚內沙,出水,再用煎香蒜片,薑片,乾葱上湯少少魚露日燴佢入味,炒香洋葱粒肉碎,加芫茜莖,回魚肚連汁炒至收乾身即可,家人一食即愛上,仲係最快KO一味菜,咁炒魚肚保持有少少爽同淋度,好正,伴飯一流.

清蒸青斑

非常好食,肉質嫩滑,又鮮味,前幾天佢特價好底食,60元,正

匈牙利燉雞鎚

 

 

呢個係看一個韓國節目學,其實即係番茄煮雞,不過有些人會加埋紅椒粉或原個紅椒,咖喱粉,我家就冇落咖喱同紅椒粉,只係最尾下咗半個紅椒煮淋佢,一樣好味,個汁又可以伴飯吃,我係先做咗個番茄汁底,用新鮮番茄,茄膏,洋葱,鍉魚,煙肉,再煎金黃雞件回番茄汁中慢煮10MIN,焗咗20MIN,再大火收少少汁,就得啦.

http://jennyc543.blogspot.hk/2013/10/blog-post_17.html

我係參考呢個網,大家有興趣看吓