瑤柱燴節瓜

呢個菜應該好多小朋友都食過,我都係,今次整比媽媽食,佢話好有水準喎,謝謝你.

鴨蛋蠔仔煎蛋

 

 

突然好想食,看吓街市有冇得買蠔仔,有喎,買咗半斤,不過我唔係煎得好有鑊氣,怕熱氣,但有芫茜,葱同芹菜,所以一樣咁香.

韓式味噌炆馬蹄五花腩

醃咗件五花腩本來想炆完佢煎香食,但突然想食炆五花腩伴鹵蛋食,因看到台灣某飲食節目整好正又想整,咁就即轉,煎香蒜片,乾葱,芫茜頭,葱段,家中有盒韓式味噌,老抽,冰糖,水,煎香件五花腩表面金黃,加紹酒,加調味,配料,加馬蹄炆係媽媽好喜歡食,咪加埋落去炆,但小妹覺得馬蹄係最好味,因吸收咗各種精華,又甜好香又爽,下次炆多點凍咗當零食一流,做法:係細火炆30min,焗30min,重覆做多2次,咁樣炆出嚟五花腩超鬆化,連帶肥膏部份都唔油,好正,入口即溶,家人話味道好正,我唔太喜歡好甜味道,呢個係咸香帶少少清甜,因有馬蹄,個汁有肉香之餘又多咗份馬蹄清甜味,好好伴飯,我都比平時食多咗飯呢...鹵蛋係用整糖心蛋做法,整好加落去浸一浸就食得,炆會冇咗糖心蛋效果,食呢餐要做番多點運至得,但好值得,會再炆.

乾煸冬菇肉碎四季豆

一個好家常菜,之前係冇加肉碎,但今次加咗冬菇粒同肉碎炒,用韓式味噌調味,成個菜好野味,連帶肉碎都好香,我仲伴米粉食,但四季豆我都係用少少油煎一煎,吸油再用燒汁,蠔油,黑糖炒至乾身,回肉碎炒至乾身,搞掂,大祝大家復活節快樂

炆焗咸香五花腩伴黃椒白菇

之前介紹小妹學網友整炆焗五花腩,現在每星期都會整,有次伴白菇炒,咁家人話下次分開上可能仲好,咁我前天試吓,個個都話咁樣食仲正,媽媽話下次夾法國包加多片番茄青瓜食一流,好呀,我一定會滿足佢哋,最緊要我要見到個個食得開心,同媽媽之前眼角膜發炎好番啦,見佢食得開胃我仲開心呀....

http://leungngasum.blogspot.hk/2014/02/blog-post_16.html

可參考呢個網

香煎海黃花魚

家人好愛食呢種size黃花魚,鮮甜好多,但就貴,呢度要60啦.不過唔係成日算啦,最緊要佢哋食得開心呢,伴粥食一流.

咸蛋白肉碎冬菜碎粥

炒咸蛋黃苦瓜時用咗2隻,剩下蛋白怎樣呢,我家中有長期肉碎,相信各家庭主婦都一樣,咁加多少少冬菜碎煲個粥,一粒鹽都不用落,又下火又好味,那晚我煎了黄花魚仔伴食,超正.

提提大家,肉碎都要調少少味,我係煲到尾才下咸蛋白,咁樣會有靚靚滑滑蛋花,唔係一開就落會煲到蛋白老晒架,同一定要試味,始終咸蛋白係咸,調番自己口味呢.

白菇黃椒炒蘆筍

係街市見有蘆筍買,10元一扎,加多個黃椒,菇菇就有個健康素菜,紅色係番茄肉,加理去配色,彩色食物見到都開心,

 

彈牙土魷馬蹄冬菇蒸肉餅

間唔中就會蒸嚟食,土魷馬蹄冬菇醃肉最佳拍檔,送飯非常野味,我都係用水展加肥豬肉,7:3份量,蒸出嚟係特別滑,同埋一定要攪到佢到佢起黏,再撻到佢起膠,呢個步驟唔懶,咁肉餅就會彈吓彈吓架啦,妹妹帶飯都話第二日食時一樣咁彈牙,我通常整多點留番少少比媽媽煎嚟整漢保食,係呀,佢會煎薄薄一圓餅夾生煎番茄同甜酸青瓜當午餐食架,係咪好識嘆呢....但我未食過,媽媽話超好食喎.....哈...

龍利葉青欖紅蘿白白背木耳萍果雪梨南北杏水

食咗牛仔骨當然要飲番碗消脂湯水啦,最好食少少白背木耳仲好呢.

360意粉屋甜品

每兩星期都係去食,因呢間係有我媽媽愛食三文魚薄pizza,今次試吓呢個甜品,好好味,佢底部係雜果(士多啤梨,桃,藍梅)芒果淡啫喱,上面係芒果濃醬汁,兩者夾埋好夾,呢個係家應該整到,大家發揮你們小宇宙整嚟食呀.

蒜香牛仔骨

見到雪花平均嗎

我一向愛用蒜粒配牛仔骨,家人話好夾,但我唔食架,全靠佢哋話我知味道,醃料係灑少少蒜粉,胡椒醃半日,6時取出塗抺芥未醬醃1-2小時,咁樣多數會好淋滑,因我揀牛仔骨多數係雪花多,好在家人話次次都係好淋滑,我會煎香蒜粒,煎香牛仔骨8成熟,等佢2MIN,切件,炒香乾葱,下汁:燒汁加蠔油,糖,上糖,回牛仔骨,蒜粒,葱粒,收汁即上卓.

 

提外話,昨天外出係街突然落大雨,我又穿新鞋(天文台話只係陰天之嗎???)好在我手袋多數有幾個透明袋,即刻套住雙腳,但咁樣行要小心,因大兩關係底部會滑身,好容易會冼,要小心行呢,哈哈....

雞油蠔油炆厚肉冬菇

大家可能覺得不健康,但加咗雞油炆冬菇真係好食好多,呢個方法係一間大型超市海味售貨員教小妹架,每次蒸雞都會留番3湯雞油,跟着煎香蒜片,乾葱,雞油炒一炒浸透冬菇,灑少少酒,加一少粒冰糖,蠔油,上湯,細火妏30MIN,焗至凍,放係雪櫃慢慢食,呢個係媽媽至爱,我妹妹就麻麻,因爐火多,所以每次炆多點比佢下午伴蝦子麵食或飯,個汁真係冇得頂,我有時晚上會3-4件加點汁,加碟生菜,飯己夠食啦.

煎紐西蘭羊架

 

 

好耐冇煎過羊架啦,今次有特價又買吓,不過媽　話唔太甘香,但夠淋,又再發掘吓先.

冬瓜猴頭菇白背木耳瑤柱蓮子芡實瘦肉湯

又開始落雨啦,呢個湯有去濕消脂之效,好清甜可口呢

咸蛋黃炒苦瓜

媽媽常說蛋係天然味精,伴落什麼地方都咁好食,咸蛋黃都係我愛調味,咸蛋肉餅,咸蛋節瓜湯.......,咸蛋黃苦瓜又係我家夏天至愛,佢能令苦瓜的苦減退之餘仲多份咸香,但咸蛋黃一定要加牛油同少少煮食油炒至起泡,才把苦瓜伴勻材好食,呢個凍咗都好食架.

苦瓜先用鹽醃3min,出水30秒,用少少油加乾葱炒香,下苦瓜片炒一回,下少少鹽,蒜鹽,胡椒,麻油,3湯上湯炒至啱自己淋度上碟,牛油炒咸蛋黃至起泡,伴苦瓜至均勻,下葱粒上卓.

蒜粒白汁芝士粒煙肉意粉

之前整白汁雞剩下50ML淡忌廉,咁整個意粉食啦,因小妹有點怕奶味,若就咁用淡忌廉整會不太啱我,咁我加多幾粒係city super買芝士粒,中文唔知係乜,但我一直都係買開呢種,再用蒜粒芫茜炒香出水意粉伴白汁,呢個口味就啱我啦,怕奶味朋友又試吓呢個方法,今次唔記得買白菇,加埋仲好味呀.

白汁底:淡忌廉50ML,雞湯150ML,5-6粒芝士粒,煙肉一片,乾葱2粒,麵粉3湯,牛油1大湯.黑胡椒

意粉出水,再用蒜粉炒香,尾加芫茜,白汁伴均可食用.

 

好味魚介紹

紅立,係海魚,但一定要眼仔碌碌同魚身立立令才新鮮,當然去相熟魚檔多數介紹新鮮比你們,大小妹之前咳,唔可以食煎,咁魚佬話呢隻係好新鮮,蒸都得架,果然係好有魚鮮甜味,煎一樣咁架.

蒸好的

 

石馬頭,清蒸,但要原皮蒸,因要保護魚油,蒸好去皮淋熟油豉油,好滑.

海黑立,之前魚佬推介過,但冇買,因有次食過一種立魚係好腥,但今次佢話一定要食,因好新鮮,同埋佢話海黑立好少有,又信佢,掂,新鮮魚味甜美.

荀瞉魚,因看黃淑儀節目,買嚟蒸,蒸咗10多分鍾,魚一樣係咁滑,正.

對不起有些原條影比大家看,因小妹有時蒸完冇時間影,又冇人肯幫我影,到想影時魚魚己四分五裂啦,哈....但小妹食過又想分享,再有好魚又再介紹比大家